رد: رجاء دعونا من العصبيه الجاهليه.....&&&&&&

[ابا صهيب]

مشكور على الموضوع

[Admin]

يعطيكم الف عافيه جميعا..........مساكم الله بالخير
كيفكم انشاء الله تمام وبخير .......

كلنا درسنا وتعلمنا وعرفنا بعد العصر الجاهلي....هذا العصر مايحتاج اني اذكر وش كان يصير فيه من تخلف وبدع ومعتقدات خرافيه كانت تناقض فطرة الانسان اللي وجدها الله فيه...معتقدات كانت تتعارض مع الدين كون انهم يصرفون العباده لغير الله سبحانه وتعالى.وكان بعضهم يصرف جزء منها ويشرك مع الله اله غيره

ومعتقدات كانت تتعارض مع الطبيعه البشريه ومبادئها.. ومنها وأد البنات وهذا اشهرها.
القصد في الكلام اللي بدأت فيه هو اني اجعله مقدمه لمايجول في خاطري. واتوقع خاطر كل انسان عاقل وفاهم ومتعلم..
الله سبحانه وتعالى قال (( وجعلناكم شعوبا وقبائل لتعارفو ان اكرمكم عند الله اتقاكم...) ).
النسب امره عظيم في الدين الاسلامي كونه يحكم الروابط الاسريه ويحفظ الاعراض ويصونها والاسلام ماهتم فيه الا لعظم شأنه
وكل شخص له الحق بأنه يفتخر في اصله وفصله ونسبه وقبيلته اللي ينتمي لها
ذالحق الاسلام شرعه له والصحابه رضوان الله عليهم من قبلنا كانو يتفاخرون في انسابهم وعرفنا ذالشي في قصائدهم وايضا من سيرهم.
لكن اللي جالسين نشوفه الحين ان الموضوع خرج عن الامر الطبيعي.. بل ان بعض الناس قام يحكم على اي شخص سواء في اخلاقه او طبعه او في اي شي قام يحكم عليه من خلال نسبه...........
خلونا نتكلم بصراحه شوي وبدون حساسيه مفرطه.
كلنا يعرف (( فلان قبيلي وفلان خضيري)) انا بتكلم على مستوى جيلنا هذا... من كنا صغار ماكنا نسمع ذالمقوله الا نادرا لان كل واحد عارف نسبه ومفتخر فيه بدون مايجرح ولا ينقص من نسب غيره.
اللي جالس يصير ان العصبيه القبيله والفكر الجاهلي بدأ يرجع ويظهر فيذالوقت
انا مو ضد ان الواحد يفتخر في نسبه لا وارجع اكرر ذالشي حق لكل شخص.
بس ان المساله تاصل للتفريق بين زوجين كانو يعيشون حياهسعيده من احلى مايكون.. وكانت تربطهم محبه ووفاء , والحجه ايش ..(( هذا مو قبيلي وعيب علينا يحط راسه في راسنا)) ؟؟؟؟؟؟؟؟؟؟؟؟؟؟؟
انا مادري وين راح عن بالهم قول النبي صلى الله عليه وسلم ((اذا اتاكم من ترضون دينه وخلقه فأنكحوه الا تفعلوه تكن فتنة في الارض وفساد كبير ))
النبي صلى الله عليه وسلم ماقال لازم يكون من قبيله ؟؟؟؟؟؟؟؟
ولا قال لازم يكون من نفس المستوى الاجتماعي والطبقه الاجتماعيه؟؟؟؟؟؟؟؟؟
حدد المواصفات بأنه يكون معتدل في دينه ويكون ذو خلق في تعامله.
باقي الحاجات تعتبر ثانويه وليست اساسيه.

المغزى في الكلام اللي ذكرته بمجمله.. العصبيه القبليه والفكر الجاهلي بدا يستفحل وصارو الناس يترابطون في روابط النسب وعندهم ذالشي اهم من روابط الدين... مع اني ماشوف اي تعارض بين الرابطين لكن الفكر في مجتمعنا اسمحولي في ذالكلمه (( غاسل يدي منه))

اتمنى اني وصلت لكم اللي في بالي ورجاء لاحد يعلق على اي كلمه الا هو متفهمها زين وعارف ايش قاعد يكتب...... الموضوع حساس جدا وانا عارف والردود بتكون حساسه.. تقبلو احتراميـــــ ....................